хайх үгээ бичих

Эрэн сурвалжлах

ЗЦА: Хар тамхи хэрэглэсэн эсэхийг ШҮЛСНИЙ ТЕСТ ашиглан тогтоож эхэллээ

Түгээх
Монголын цагдаагийн баяр 97 жилийн ойн өдөр Цагдаагийн ерөнхий газрын Хар тамхитай тэмцэх газрынхан хар тамхи, мансууруулах бодис илрүүлэх олон улсын жишигт нийцсэн тоног төхөөрөмж ашигладаг боллоо.
Тус албаныхан 2018 оны эхний зургаан сарын байдлаар энэ төрлийн 91 хэрэгт 201 хүн холбогдож шалгагсан  нь өмнөх оны мөн үетэй харьцуулахад 40 хэргээр буюу 78.4 хувь, холбогдогч нь 68 хүнээр буюу 51.1 хувиар өссөн гэлээ ч  хэрэгт холбогдогчдыг урьдчилан сэргийлүүлэх ажлыг ч хийж байна.
Цагдаагийн байгууллагаас хар тамхитай тэмцэх ажлыг эрчимжүүлэх зорилгоор Эрүүгийн цагдаагийн албаны бүтцэд байсан Хар тамхитай тэмцэх хэлтсийг газар болгон бүтэц, орон тоог нэмэгдүүлж, 2018 оны хоёрдугаар сард Цагдаагийн төв байгууллагын харьяа Хар тамхитай тэмцэх газар болгон өргөжүүлсэн нь гэмт хэргийн илрүүлэлтийн нэмэгдүүлэх үр дүн өгчээ. 
Хар тамхи, мансууруулах бодистой тэмцэх, илрүүлэхэд хамгийн чухал зүйл бол олон улсын стандартад нийцсэн орчин үеийн дэвшилтэт технологи юм. Манай цагдаагийн байгууллага олон улсын хар тамхитай тэмцэх чиг үүрэг бүхий байгууллагууд үйл ажиллагаандаа ашиглаж байгаа орчин үеийн дэвшилтэт техник, технологийг судалж 2018 оны улсын төсөвт тусгагдсан хөрөнгөөр АНУ, Англи улсад үйлдвэрлэсэн TARGET ID, HBI-120, SABRE™5000 зэрэг төхөөрөмж, уян камертай толь, загварын аналитик жин, рентген төхөөрөмж, шээснээс илрүүлэгч тест зэргийг худалдан авч ашиглаж байна.
Сэлэнгэ, Дархан-Уул, Орхон, Дорнод, Дорноговь, Өмнөговь аймгийн Цагдаагийн газар, Иргэний агаарын тээвэр дэх цагдаагийн газар, хэлтэст хар тамхи, мансууруулах болон тэсэрч дэлбэрэх бодисыг илрүүлэгч, тандан судлагч тоног төхөөрөмжийг хүлээлгэн өгч, алба хаагчдыг нь сургалтад хамруулжээ. Түүнчлэн замын цагдаагийн албаны алба хаагчид ч хар тамхи, мансууруулах бодис хэрэглэсэн эсэхийг шалгах анхан шатны шүлсний тестийг ашиглаж байгаа юм.
Хар тамхитай тэмцэх газраас чиг үүргийнхээ дагуу Шүүхийн шийдвэр гүйцэтгэх ерөнхий газартай хамтран ажиллаж, хар тамхи, мансууруулах бодистой холбоотой гэмт хэрэгт ял шийтгэгдсэн ялтнуудад сургалт зохион байгуулсан байна.
Мансууруулах эм, сэтгэцэд нөлөөт бодистой холбоотой гэмт хэргээс урьдчилан сэргийлэх зорилгоор нийслэлийн Баянзүрх, Сүхбаатар, Хан-Уул дүүрэгт үйл ажиллагаа явуулдаг шөнийн цэнгээний газруудад гэнэтийн шалгалт хийжээ. Энэхүү ажиллагааг нийслэлийн прокурорын газартай зохион байгуулсан бөгөөд хар тамхи, мансууруулах бодис хэрэглэсэн, тээвэрлэсэн этгээдүүдийг баривчлах ажиллагааг  явуулжээ. Энэ  оны дөрөвдүгээр сард Бүгд Найрамдах Хятад Ард Улсаас мансууруулах бодис биедээ нуун улсын хилээр хууль бусаар нэвтрүүлж, бусдад зарж борлуулах зорилгоор тээвэрлэж явсан Монгол Улсын иргэн С-ийг Баянзүрх дүүргийн нутаг дэвсгэрээс баривчилсан. Мөн гуравдугаар сард Монгол Улсын иргэн М нарын хоёр этгээд хар тамхи, мансууруулах бодисын төрөлд орох  ICE буюу мөсийг борлуулах зорилгоор улсын хилээр их хэмжээгээр хууль бусаар нэвтрүүлсэн үйлдлийг илрүүлэн Баянзүрх дүүргийн нутаг дэвсгэрээс баривчилж, сэжигтэй этгээдүүдийг Шүүхийн шийдвэр гүйцэтгэх ерөнхий газрын харьяа хорих 461 дүгээр ангид саатуулан шалгалтын ажиллагаа явуулсан хэмээн ЦЕГ-ын Хар тамхитай тэмцэх албанаас мэдээллээ.

Таны сэтгэгдэл

Your email address will not be published. Required fields are marked *